Allt starfslið íslenska karlalandsliðsins í knattspyrnu er komið í sóttkví vegna gruns um kórónuveirusmit en þetta kemur fram í fréttatilkynningu sem KSÍ sendi frá sér.
Erik Hamrén, þjálfari liðsins, og Freyr Alexandersson, aðstoðarþjálfari liðsins, eru því báðir komnir í sóttkví en Ísland mætir Belgíu í Þjóðadeild UEFA á Laugardalsvelli á morgun klukkan 18:45 að íslenskum tíma.
Í fréttatilkynningu KSÍ kemur fram er það sé ekkert sem bendi til þess að smit sé í leikmannahópi íslenska liðsins og því ekkert því til fyrirstöðu að leikurinn geti farið fram á tilsettum tíma á morgun.
„Fulltrúar fjölmiðla eru vinsamlegast beðnir um að bíða átekta á meðan verið er að greina stöðuna og vinna úr upplýsingum,“ segir ennfremur í fréttatilkynningu KSÍ.
Fréttin hefur verið uppfærð.