Kvennalandsliðið í knattspyrnu mun halda til Gautaborgar strax á morgun og æfa þar fram að leiknum mikilvæga gegn Svíum í undankeppni EM 2022.
Fótbolti.net greinir frá þessu í dag. Leikurinn er á þriðjudaginn í næstu viku og verða landsliðskonurnar því í Svíþjóð í viku en þess má geta að nokkrar búa og leika í Svíþjóð hvort sem er.
„Eins og aðrir þá virðum við þær reglur sem settar eru og eru í gildi hér. Við setjum okkur ekkert út fyrir sviga í því. Það kom aldrei til tals að við myndum fá einhverja sérstaka undanþágu,“ er meðal annars haft eftir Jóni Þór á Fótbolti.net en fram kom í viðtali við hann í Morgunblaðinu á föstudaginn að útlit væri fyrir að fara þyrfti þá leið að fara snemma til Svíþjóðar og æfa þar.