Knattspyrnumaðurinn Jóhannes Kristinn Bjarnason æfir nú með sænska úrvalsdeildarfélaginu Norrköping en það er fótbolti.net sem greinir frá þessu.
Jóhannes er fæddur árið 2005 en hann kom inn á sem varamaður í 2:0-sigri KR gegn Breiðabliki í Kópavoginum 21. september síðastliðinn og var það hans fyrsti leikur í efstu deild.
Jóhannes er sonur Bjarna Guðjónssonar, aðstoðarþjálfara KR, en frændi hans Ísak Bergmann Jóhannesson leikur með Norrköping í Svíþjóð og hefur heldur betur slegið í gegn.
Ísak Bergmann er sonur Jóhannesar Karls Guðjónssonar, þjálfara ÍA í úrvalsdeild karla, en Jóhannes og Bjarni eru bræður.
Norrköping er með 40 stig í öðru sæti sænsku úrvalsdeildarinnar þegar fimm umferðir eru eftir af tímabilinu en Häcken og Elfsborg eru einnig með 40 stig í þriðja og fjórða sæti deildarinnar.
Malmö er með 10 stiga forskot á toppi deildarinnar en liðið er með 50 stig eftir 25 umferðir.