Jóhann Berg Guðmundsson er í byrjunarliði Burnley sem mætir Crystal Palace á heimavelli í ensku úrvalsdeildinni í fótbolta en flautað verður til leiks klukkan 17:30.
Leikurinn er sá hundraðasti hjá Jóhanni í úrvalsdeildinni og hafa þeir allir komið fyrir Burnley en hann kom til félagsins frá Charlton árið 2016.
Íslenski kantmaðurinn hefur glímt við meiðsli á leiktíðinni og aðeins verið í byrjunarliðinu í ensku úrvalsdeildinni í tvígang vegna þessa, en hann hefur nú jafnað sig á meiðslunum.
Burnley hefur farið afar illa af stað á leiktíðinni og er liðið án sigurs eftir sjö leiki og aðeins með tvö stig og aðeins skorað þrjú mörk. Crystal Palace er í níunda sæti með 13 stig.