Sigurjón Rúnarsson og Þorbjörg Jóna Garðarsdóttir voru valin best í lokahófi knattspyrnudeildar Grindavíkur sem fram fór á dögunum.
Sigurjón lék stórt hlutverk í hjarta varnarinnar hjá Grindvíkingum í 1. deildinni, Lengjudeildinni í sumar, en liðið var í fjórða sæti deildarinnar þegar ákveðið var að hætta keppni á Íslandsmótinu í lok október.
Þorbjörg Jóna var í lykilhlutverki í vörn Grindavíkur í 2. deildinni í sumar en liðið fór með sigur af hólmi í deildinni og leikur því í 1. deildinni á næstu leiktíð eftir að hafa fallið úr 1. deildinni, haustið 2019.
Þá var Oddur Ingi Bjarnason valinn efnilegasti leikmaður Grindavíkur í karlaflokki og Aron Jóhannsson sá mikilvægasti.
Kvennamegin var Unnur Stefánsdóttir valin efnilegust og Eva Lind Daníelsdóttir sú mikilvægasta.