Viðureign Þýskalands og Íslands í fyrstu umferð undankeppni heimsmeistaramóts karla í knattspyrnu sem fram fer þann 25. mars verður leikin í Duisburg á Schauinsland-Reisen-leikvanginum.
Hann rúmar ríflega 31 þúsund áhorfendur en þar var m.a. leikið í átta liða úrslitum Evrópudeildarinnar í sumar. Völlurinn var tekinn í notkun árið 2004 og hefur verið heimavöllur Duisburg frá þeim tíma. Liðið leikur nú í þýsku C-deildinni eftir að hafa síðast verið í efstu deild tímabilið 2007-08.
Leikurinn verður sögulegur fyrir íslenska landsliðið því þetta verður 500. A-landsleikur karla frá upphafi, allt frá því Ísland tók á móti Danmörku á Melavellinum í fyrsta leik sínum árið 1946.