Heyrði af áhuganum hjá Bayern í miðri prófatörn

Karólína Lea Vilhjálmsdóttir.
Karólína Lea Vilhjálmsdóttir. mbl.is/Eggert Jóhannesson

Landsliðskonan Karólína Lea Vilhjálmsdóttir vonast til þess að leika sinn fyrsta leik fyrir þýska stórveldið Bayern München í marsmánuði.

Miðjukonan, sem er einungis 19 ára gömul, skrifaði undir þriggja og hálfs árs samning í Þýskalandi en hún er að jafna sig á hnémeiðslum og vonast til þess að hefja æfingar með þýska liðinu í næstu viku.

Karólína varð Íslandsmeistari með Breiðabliki síðasta haust en hún gekk til liðs við Blika frá uppeldisfélagi sínu FH eftir tímabilið 2017 og á að baki 78 leiki í efstu deild þar sem hún hefur skorað ellefu mörk.

Þrátt fyrir ungan aldur og að vera að stíga upp úr meiðslum ætlar Karólína sér stóra hluti með þýska stórliðinu á komandi leiktíð en Bayern hefur þrívegis orðið Þýskalandsmeistari; 1976, 2015 og 2016.

„Öll umgjörðin hérna í kringum félagið er svakalega flott og fagmennskan er gríðarlega mikil,“ sagði Karólína í samtali við Morgunblaðið.

„Ég er í endurhæfingu þessa stundina eftir að hafa gengist undir aðgerð á hné í desember en samt sem áður er ég að æfa tíu sinnum í viku. Það er því æft af fullum krafti, þótt ég sé í endurhæfingu, en áherslan er mestmegnis á þolæfingar þótt boltanum sé aðeins blandað með líka.

Stelpurnar hérna eru mjög indælar og mér hefur verið tekið gríðarlega vel af bæði leikmönnum og öllum sem starfa í kringum félagið. Móttökurnar sem ég hef fengið hafa í raun komið mér aðeins á óvart og ég gæti ekki verið spenntari fyrir komandi tímum með liðinu,“ bætti Karólína við.

Ætlaði að spila á Íslandi

Karólína skrifaði undir þriggja ára samning við Breiðablik í lok nóvember og var planið að spila á Íslandi á komandi keppnistímabili.

„Það var einhver áhugi frá liðum í Skandinavíu en planið var alltaf bara að taka alla vega eitt ár í viðbót heima á Íslandi. Svo kom Bayern München allt í einu inn í þetta og ég heyrði fyrst af áhuga þeirra þegar umboðsmaðurinn minn hringdi í mig í miðjum lokaprófum í Háskóla Íslands. Í framhaldinu af því fór ég á fund með forráðamönnum félagsins og eftir það var þetta í raun aldrei spurning.

Viðtalið við Karólínu í heild sinni er að finna í Morgunblaðinu sem kom út í morgun. 

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.990 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »