Þór frá Akureyri er komið í sextán liða úrslit bikarkeppninnar, Mjólkurbikarsins, eftir sigur gegn Grindavík á SaltPay-vellinum á Akureyri í dag.
Leiknum lauk með 2:1-sigri Þórsara en Jakob Árnason kom þeim yfir strax á 4. mínútu áður en Álvaro Montejo tvöfaldaði forystu Þórsara á 59. mínútu.
Mirza Hasecic minnkaði muninn fyrir Grindavík á 77. mínútu en lengra komust Grindvíkingar ekki og Þórsarar fögnuðu sigri.
Þórsarar verða því í pottinum þegar dregið verður í sextán liða úrslitin en Grindavík er úr leik.