Frá Austurríki til Selfoss

Knattspyrnukonan Kristrún Rut Antonsdóttir mun ganga til liðs við Selfoss þegar félagaskiptaglugginn opnast á nýjan leik í lok júní. 

Kristrún, sem er 26 ára miðjumaður, lék síðast á Selfossi sumarið 2018 en hún hefur komið víða við í Evrópu á síðustu árum, leikið með Chieti og AS Roma á Ítalíu, Avaldsnes í Noregi, BSF í Danmörku, Mallbacken í Svíþjóð og nú síðast með St. Pölten í Austurríki en hún varð austurrískur meistari með liðinu í vor. Hún hefur leikið 117 meistaraflokksleiki fyrir Selfoss, þar af 55 í efstu deild.

„Það er frábært að fá Kristrúnu í okkar hóp. Við þekkjum hana vel og hún er leikmaður að mínu skapi. Hún getur leyst margar stöður, er ósérhlífin og vill vinna mikið og æfa mikið. Hún kemur með gæði og reynslu inn í hópinn og svo er hún með stórt Selfosshjarta, þannig að það er mikil tilhlökkun að fá hana heim,“ er haft eftir Alfreð Elíasi Jóhannssyni, þjálfara liðsins, í yfirlýsingu. 

Selfoss er í þriðja sæti Pepsi Max-deildarinnar, tveimur stigum á eftir toppliði Breiðabliks. 

• Blogga um frétt