Kristófer Jónsson, átján ára gamall knattspyrnumaður úr Val, hefur verið lánaður í eitt ár til ítalska félagsins Venezia.
Valsmenn greindu frá þessu á samskiptamiðlum sínum fyrir stundu.
Kristófer hefur aðeins verið í Val í hálft ár en hann kom til félagsins frá Haukum fyrir þetta tímabil. Hann lék fimm leiki með Valsmönnum á undirbúningstímabilinu í vetur en hefur ekki komið við sögu á Íslandsmótinu.
Hann lék 22 leiki með meistaraflokki Hauka á Íslandsmótunum 2019 og 2020 og á að baki átta leiki með yngri landsliðum Íslands.
Kristófer er fjórði Íslendingurinn í röðum Venezia, en borgin er ávallt nefnd Feneyjar á íslensku. Bjarki Steinn Bjarkason og Óttar Magnús Karlsson eru leikmenn aðalliðs félagsins sem vann sér sæti í A-deildinni í vor og Jakob Franz Pálsson kom til liðs við félagið frá Þór á Akureyri í síðasta mánuði en hann er jafnaldri Kristófers.
#valurfotbolti #fotboltinet #arancioneroverde pic.twitter.com/QAvL7JehUC
— ValurFotbolti (@Valurfotbolti) July 23, 2021