Komumst oft í gírinn eftir að fá á okkur mark

Anna María Baldursdóttir, fyrirliði Stjörnunnar, var að vonum ánægð með 2:1-endurkomusigur liðsins gegn Selfossi í úrvalsdeild kvenna í knattspyrnu, Pepsi Max-deildinni, í kvöld.

„Mér fannst við ekki byrja svo vel og þær voru sterkari og pressuðu svolítið á okkur. Svo þegar leið á fyrri hálfleikinn og í seinni hálfleik fannst mér við alveg taka yfir og eiga sigurinn skilið,“ sagði Anna María í samtali við mbl.is eftir leik.

Stjarnan hefur nú unnið sex sigra í deildinni á tímabilinu, þar af fjóra með markatölunni 2:1. Er það einhver ákveðin uppskrift sem Stjörnukonur eru að fara eftir sem veldur því að leikirnir enda á þann veg?

„Já, svo virðist vera. Við lendum oft undir og þá komumst við í gírinn, eftir að hafa fengið mark á okkur. En það er gott að ná að skora tvö mörk og vinna leikinn, það er það sem skiptir máli,“ sagði hún.

Frétt af mbl.is

Úlfa Dís gerði út af við Selfyssinga

Eftir að hafa verið marki undir í hálfleik jöfnuðu Stjörnukonur metin snemma í síðari hálfleiknum, þegar Úlfa Dís Úlfarsdóttir skoraði fyrra mark sitt í leiknum.

„Það var sætt að sjá hann inni af því að höfðum alveg fengið færi til að skora, bæði í fyrri hálfleik og seinni. Það var mjög sætt að sjá boltann inni í bæði skiptin,“ bætti Anna María við, en sigurmark Úlfu Dísar kom svo á 80. mínútu.

Anna María Baldursdóttir í leik með Stjörnunni gegn Val fyrr í sumar. mbl.is/Árni Sæberg

Sigurinn fleytir Stjörnunni upp í þriðja sætið, þar sem liðið vill vitanlega vera að hennar sögn. „Við stefnum á það og viljum bara taka þrjú stig í næsta leik, það er alltaf stefnan. Þannig að við höldum bara áfram,“ sagði Anna María að lokum í samtali við mbl.is.

• Blogga um frétt