Máni Austmann Hilmarsson, kantmaður knattspyrnuliðs Leiknis úr Reykjavík, missti af leik liðsins gegn Keflavík í úrvalsdeild karla, Pepsi Max-deildinni, í gær vegna meiðsla.
Í samtali við Fótbolta.net greindi Sigurður Heiðar Höskuldsson, þjálfari Leiknis, frá því að það væri vegna þess að Máni hafi lent í bílslysi á dögunum.
Hann sat uppi í stúku í leiknum í gær eftir að hafa byrjað síðasta deildarleik gegn ÍA.
Af þessum sökum mun Máni einnig missa af síðasta leik Leiknis í deildinni, gegn Víkingum úr Reykjavík næstkomandi laugardag.
Máni sagði sjálfur í samtali við Fótbolta.net að hann hafi fengið heilahristing og misst meðvitund, auk þess sem hann meiddist á hálsi og í baki þegar keyrt var aftan á kyrrstæðan bíl hans.
Hann mun ekki geta æft næstu mánuði vegna meiðslanna.