Nökkvi Hjörvarsson fékk óvænt fyrirliðibandið hjá Þór frá Akureyri þegar liðið vann 3:2-sigur gegn Þrótti í Laugardal í lokaleik liðanna í 1. deildinni, Lengjudeildinni, um síðustu helgi.
Nökkvi, sem er 15 ára gamall, kom inn á sem varamaður á 77. mínútu fyrir Ásgeir Marínó Baldvinsson í stöðunni 3:2 en þetta var fyrsti meistaraflokksleikur Nökkva á ferlinum.
Á 90. mínútu fór fyrirliðinn Jóhann Helgi Hannesson af velli í sínum síðasta leik á ferlinum og lét hann Nökkva fá fyrirliðabandið.
„Þú mátt eiga þetta!“ sagði Jóhann við Nökkva en það var Akureyri.net sem greindi frá þessu.
Nökkvi er í byrjunarliði U15-ára landsliðsins sem mætir Finnlandi í æfingaleik í Mikkeli í Finnlandi í dag.