Þorlákur Árnason hefur verið ráðinn þjálfari karlaliðs Þórs frá Akureyri í knattspyrnu. Þetta tilkynnti félagið á blaðamannafundi í dag.
Þorlákur tekur við liðinu af Orra Frey Hjaltalín sem stýrði liðinu í 1. deildinni á nýafstaðinni leiktíð en Orri lét af störfum þegar nokkrar umferðir voru eftir af tímabilinu.
Þorlákur lét af störfum sem yfirmaður knattspyrnumála hjá Hong Kong í sumar eftir að hafa gegnt starfinu frá því í janúar 2019.
Hann hefur þjálfað yngri landslið Íslands ásamt því að hafa stýrt bæði karlaliði Vals og Fylkis á ferlinum, sem og kvennaliði Stjörnunnar.
Þórsarar höfnuðu í níunda sæti 1. deildarinnar á síðustu leiktíð eftir að hafa dregist niður í fallbaráttu á lokaspretti mótsins.