Galdur Guðmundsson, 16 ára knattspyrnumaður úr Breiðabliki, komst í metabækur Kópavogsliðsins í gærkvöld þegar hann skoraði glæsilegt mark í stórsigri á Val, 6:2, í 32ja liða úrslitum Mjólkurbikarsins á Kópavogsvelli.
Galdur varð þar með yngsti markaskorari í mótsleik með Breiðabliki, 16 ára og sex vikna gamall.
Með því sló hann sex ára gamalt með Ágúst Eðvalds Hlynssonar sem skoraði 16 ára og tveggja mánaða gamall fyrir Breiðablik í bikarleik gegn 4. deildarliðinu Kríu árið 2016.
Það gerðist reyndar á nákvæmlega sama degi, 26. maí, og til að bæta um betur þá var Ágúst Eðvald í liði Vals í gær, og kom inn á sem varamaður eins og Galdur. Hann var inni á vellinum þegar Galdur sló met hans.
Galdur hefur vakið talsverða athygli en hann skoraði í öllum þremur leikjum Íslands á U16 ára móti á vegum UEFA í Svíþjóð fyrr í vor en þar vann Ísland bæði Svía og Svisslendinga og stóð uppi sem sigurvegari á mótinu. Hann verður ekki lengi í viðbót í röðum Breiðabliks því Galdur gengur til liðs við nýkrýnda Danmerkurmeistara FC Köbenhavn þann 1. júlí.