Selfoss og Valur eru búin að tryggja sér sæti í 8-liða úrslitum bikarkeppni kvenna í knattspyrnu, Mjólkurbikarsins, með góðum sigrum í 16-liða úrslitunum í kvöld.
Selfoss fékk Aftureldingu í heimsókn í Bestu deildarslag.
Gestirnir tóku forystuna í fyrri hálfleik með marki Hildar Karítasar Gunnarsdóttur.
Staðan var 0:1 í leikhléi en í þeim síðari sneru Selfyssingar taflinu við.
Miranda Nild, Brenna Lovera og Embla Dís Gunnarsdóttir skoruðu fyrir heimakonur og tryggðu Selfossi þannig 3:1-sigur.
Valur gerði þá góða ferð til Sauðárkróks þegar liðið mætti heimakonum í Tindastóli.
Ásdís Karen Halldórsdóttir, Þórdís Hrönn Sigfúsdóttir, Ída Marín Hermannsdóttir og Cyera Hintzen komu Val í 4:0 áður en Hugrún Pálsdóttir minnkaði muninn fyrir Stólana í uppbótartíma.
Lokatölur því 4:1.
Selfoss og Valur eru því komin áfram í 8-liða úrslitin ásamt Þrótti úr Reykjavík, KR, Stjörnunni og Þór/KA.
Á morgun mætast Fjarðabyggð/Höttur/Leiknir og Breiðablik og Keflavík og ÍBV í síðustu tveimur leikjum 16-liða úrslitanna.
Markaskorarar eru fengnir af Fótbolta.net.