Stefán Árni Geirsson var ekki í leikmannahópi KR í 4:0 sigri á ÍBV í Bestu deild karla í fótbolta í dag en ástæðan fyrir því er sú að hann er í agabanni.
Rúnar greindi frá þessu í samtali við Fótbolta.net eftir leikinn í dag.
„Stefán var í agabanni í dag og tók því ekki þátt í verkefninu,“ sagði Rúnar.
Stefán Árni er aðeins 21 árs gamall og uppalinn í KR. Hann sýndi mikla hæfileika á síðustu leiktíð og bundu KR-ingar mikla von við hann fyrir tímabilið.
Hann hefur ekki staðið undir væntingum það sem af er tímabilsins en meiðsli hafa einnig sett strik sitt í reikninginn. Í þetta skipti er það hinsvegar agabann sem kom í veg fyrir veru hans í dag.