„Ég óttast að dag einn verði mér slaufað“

Gunnar Júlíus Helgason, fráfarandi formaður knattspyrnudeildar Þróttar.
Gunnar Júlíus Helgason, fráfarandi formaður knattspyrnudeildar Þróttar. Ljósmynd/Þróttur Vogum

Gunnar Júlíus Helgason hefur látið af störfum sem formaður knattspyrnudeildar Þróttar úr Vogum.

Þetta tilkynnti hann í áhugaverðum pistli sem hann birti á fótbolta.net í gær en hann hefur gegnt ýmsum störfum innan félagsins í gegnum tíðina.

Fyrir fimm árum síðan kom það í minn hlut að semja við leikmann um að leika fyrir mitt félag,“ skrifar Gunnar í pistli sínum.

„Mér leist vel á leikmanninn. Hann kom vel fyrir, drakk ekki áfengi, notaði ekki tóbak, var góður í fótbolta og vildi ganga til liðs við félagið og leggja sitt af mörkunum. En hann tók það skýrt fram að hann hefði verið dæmdur fyrir kynferðisbrot, nánar tiltekið fyrir ósæmileg skilaboð og snertingu á rassi utan klæða.

Hann áttaði sig á því að hann hafði gert slæm mistök, undi dómnum, tók út sína refsingu og reyndi að halda áfram með lífið. Leikmaðurinn kom heiðarlega fram strax frá byrjun. Félagið samdi við leikmanninn og hefur það samstarf verið farsælt fyrir báða aðila,“ skrifaði Gunnar.

Samskiptaráðgjafi hafði samband

Samskiptaráðgjafi íþrótta- og æskulýðsstarf hafði síðar samband við félagið vegna umrædds leikmanns.

En svo bar við að fyrir ári síðan þá hafði samband við félagið svokallaður Samskiptaráðgjafi íþrótta- og æskulýðsstarfs sem heyrir undir málasvið mennta- og menningarráðuneytis samkvæmt lögum, með KSÍ og ÍSÍ í bakhöndinni.Erindið var að benda okkur á að við yrðum að rifta samningi við þennan leikmann og láta hann fara undir eins frá félaginu þar sem við værum með barnastarf.

Þetta kom sem sagt inn á borð félagsins mörgum árum eftir að viðkomandi leikmaður hafði brotið af sér en í millitíðinni hafði leikmaðurinn einbeitt sér að því vera góð fyrirmynd og góður og gegn þjóðfélagsþegn, fordæmt fyrri hegðun sína, tekið út sinn dóm og stofnað fjölskyldu en samkvæmt Samskiptaráðgjafa ríkisins var leikmaðurinn enn álitinn hættulegur og nú skyldi refsa honum aftur.“

Búinn að fara í gegnum dómskerfið

Gunnar hefur sjálfur gert mistök á lífsleiðinni sem hann kemur svo inn á í pistlinum.

„En af hverju er ég að setjast niður og skrifa þetta núna? Jú, af því að þetta snertir mig og mér finnst sárt að sjá hvernig Samskiptaráðgjafi ríkisins ætlar að slaufa leikmanninum með fyrrgreindum hætti. Sjálfur gerði ég líka mistök, sjálfur er ég með dóm á bakinu, dóm fyrir manndráp af gáleysi.

Ég er búinn að fara í gegnum dómskerfið, ég er búinn að taka út minn dóm, búinn að takast á við sorgina, kvíðann og áfallastreituna sem aldrei er langt undan. Ég er enn að reyna að halda áfram og reyna að vera besta útgáfan af sjálfum mér. En í mér býr ótti, ég óttast að dag einn verði mér slaufað, að ráðherra láti undan þrýstihópum og setji í starfslýsingu Samskiptaráðgjafa að elta mig uppi og slaufa mér af því að ég sé hættulegur ákveðnum hópi fólks og að í mér hljóti að búa einbeittur brotavilji og því sé rétt að refsa mér aftur.“

Lögð áhersla á slaufunarmenningu

Gunnar ítrekar svo að hann eigi ekki samleið með ÍSÍ, KSÍ og ráðuneyti íþróttamála lengur.

„Ég hef sjaldan verið stoltari af mínu félagi en ég er í dag og sérlega ánægjulegt að líta um öxl og sjá hverju það hefur áorkað. En ég hef líka áttað mig á því að hvað þetta mál varðar að ég á enga samleið lengur með ÍSÍ, KSÍ og ráðneyti íþróttamála.

Ég vil ekki starfa áfram sem sjálfboðaliði fyrir sjálfboðaliðahreyfingu sem starfar á þennan hátt og leggur áherslu á slaufunarmenningu. Þess vegna hef því sagt mig frá öllum trúnaðarstörfum fyrir mitt ástkæra félag og stíg inn í skuggann,“ segir Gunnar en pistilinn má lesa í heild sinni með því að smella hér.

mbl.is