Bandaríska knattspyrnukonan Murphy Agnew var besti leikmaðurinn í 18. og síðustu umferð Bestu deildar kvenna í fótbolta að mati Morgunblaðsins.
Murphy fékk tvö M fyrir frammistöðu sína með Þrótti í óvæntum sigri gegn Breiðabliki, 3:2, í lokaumferðinni á laugardaginn. Hún skoraði fyrsta mark Þróttar og lagði upp annað markið fyrir Ólöfu Sigríði Kristinsdóttur.
Þær Ólöf og Danielle Marcano, samherjar Murphy, fengu líka 2 M fyrir sína frammistöðu og þá einkunn fengu líka Olga Sevcova og Ameera Hussen, leikmenn ÍBV, eftir sigur á Aftureldingu, 3:0.
Þessar fimm eru allar í síðasta úrvalsliði umferðar á tímabilinu 2022 sem má sjá í heild sinni á íþróttasíðum Morgunblaðsins í dag.