„Ég bjóst ekki beint við þessu, en á sama tíma kom þetta mér ekki á óvart. Þetta var skemmtilegt,“ sagði Ólöf Sigríður Kristinsdóttir, nýjasta A-landsliðskona Íslands í fótbolta, í samtali við Morgunblaðið.
Ólöf er uppalin hjá Val en hefur undanfarin ár raðað inn mörkum fyrir Þrótt úr Reykjavík í efstu deild, þar sem hún hefur skorað 18 mörk í 39 leikjum.
„Ég ræddi aðeins við hann þegar það voru æfingar í nóvember. Þannig að ég vissi að hann hafði verið að fylgjast með því sem ég var að gera,“ sagði hún. En hvernig kemst ný A-landsliðskona að því að hún sé í hópnum í fyrsta skipti?
„Ég fékk skilaboð frá vinkonu minni og svo skoðaði ég heimasíðu KSÍ og sá þetta þar. Það var enginn hjá landsliðinu eða KSÍ sem hringdi í mig. Ég var að vinna þegar ég fékk þessar fréttir og var mjög glöð og stolt,“ sagði Ólöf Sigríður.
Nánar er rætt við Ólöfu í Morgunblaðinu sem kom út í morgun.