Ætlaði ekki að láta barn stöðva mig í að halda áfram

Sandra María Jessen, fyrirliði Þórs/KA í knattspyrnu og leikmaður maímánaðar samkvæmt einkunnagjöf Morgunblaðsins, segir það hafa verið öðruvísi að snúa aftur eftir barnsburð samanborið við að meiðast alvarlega.

Frétt af mbl.is

Ég vil vera með þeim markahæstu

„Ég hef tvisvar sinnum lent í erfiðum meiðslum. Ég hef slitið bæði fremra krossband og aftara krossband og hef þurft að vera frá í lengri tíma.

Samt sem áður finnst mér það öðruvísi að koma til baka eftir barnsburð þar sem líkaminn er bara á allt öðrum stað.

Þú ert búin að ganga í gegnum þvílíkar breytingar, byrjar aftur á núllpunkti og þarft að vinna þig aftur upp í gamla formið,“ sagði Sandra María í samtali við mbl.is.

Með það mikið keppnisskap

Hún eignaðist dóttur sína í september árið 2021 og sneri aftur til keppni tímabilið á eftir.

„Ég fékk rosalega góða aðstoð og hjálp frá styrktarþjálfum og þjálfurum Þórs/KA yfir höfuð. Þau hjálpuðu mér að koma mér á þann stað sem ég er á í dag.

Ég er búin að vinna með fullt af góðu fólki sem hefur komið með margar góðar ábendingar. Síðan var ég bara staðráðin í því að ég ætlaði ekkert að láta barn stöðva mig í að halda áfram í fótbolta.

Ég er enn þá ung og á nóg af árum eftir. Ég er bara með það mikið keppnisskap að ég er komin á þann stað sem ég er á núna,“ bætti hin 28 ára gamla Sandra María við.

Nánar var rætt við sóknarmanninn öfluga í Morgunblaðinu á laugardag.

• Blogga um frétt