„Ég er mjög spenntur,“ sagði Åge Hareide, þjálfari íslenska karlalandsliðsins í knattspyrnu, í samtali við mbl.is á blaðamannafundi íslenska liðsins í höfuðstöðvum KSÍ í Laugardal í dag.
Norðmaðurinn tilkynnti 25 manna leikmannahóp sinn á blaðamannafundi í Laugardalnum í dag fyrir leikina mikilvægu gegn Slóvakíu og Portúgal í J-riðli undankeppni EM 2024 en báðir leikirnir fara fram á Laugardalsvelli.
„Sem þjálfari þá lifir maður fyrir leikina og það eru leikirnir sem gefa manni orku og kraft. Maður undirbýr sig og liðið eins og best verður á kosið en á sama tíma veistu aldrei hver útkoman verður.
Adrenalínið flæðir um mann allan, rétt fyrir leik, og tilfinningin er í raun ólýsanleg, líka meðan á leik stendur og það er stærsta ástæðan fyrir því að maður er ennþá að í þessum bransa,“ sagði Hareide.
Uppselt er á leik Íslands og Portúgals hinn 20. júní en það er ennþá hægt að kaupa miða á leik Íslands og Slóvakíu sem fram fer hinn 17. júní.
„Fullur völlur gefur okkur öllum aukaorku og sérstaklega leikmönnunum. Íslenskir stuðningsmenn eru stórkostlegir og þeir fylkja sér alltaf á bak við liðið, sama hvað.
Við þurfum svo sannarlega á því að halda. Leikurinn gegn Slóvakíu er að sjálfsögðu á þjóðhátíðardegi Íslendinga og það væri fátt betra en að fá fólk á völlinn og geta svo fagnað með þeim í leikslok.“
En er þjálfarinn búinn að ákveða byrjunarliðið fyrir leikinn gegn Slóvakíu?
„Ég er með hugmynd, ákveðna hugmynd í hausnum á mér, en ég ætla ekki að segja þér hana,“ bætti landsliðsþjálfarinn við í léttum tón í samtali við mbl.is.