Auðvitað söknum við hennar
Setja bókamerki
Sveindís Jane Jónsdóttir missir af landsleik Íslands og Þýskalands í Þjóðadeildinni í fótbolta í Bochum á morgun, rétt eins og hún missti af leiknum gegn Wales á föstudaginn vegna meiðsla.
Þorsteinn Halldórsson landsliðsþjálfari tók undir mikilvægi hennar fyrir liðið og að fjarvera hennar hefði mikil áhrif þegar mbl.is ræddi við hann fyrir æfingu landsliðsins í Düsseldorf á morgun.
/frimg/1/44/9/1440987.jpg)
„Ég held að það hafi allir séð gegn Wales hversu mikið við söknuðum hennar. Wales spilaði mjög framarlega á vellinum með sitt lið og það hefði verið draumaleikur fyrir hana að komast í svæðin fyrir aftan vörnina.
En samt unnum við leikinn og um það snýst þetta allt á endanum. Við þurfum að vera klár í að takast á við þau skakkaföll sem við lendum í og við reynum að gera það áfram,“ sagði Þorsteinn Halldórsson.
Hlín Eiríksdóttir og Amanda Andradóttir voru í fremstu víglínu hjá íslenska liðinu gegn Wales, ásamt Karólínu Leu Vilhjálmsdóttur sem var fremst á miðjunni, og líklegt er að þær verði allar í liðinu gegn Þýskalandi á morgun.
