„Ég er hrærður“
Setja bókamerki
„Tilfinningin er ólýsanleg,“ sagði Davíð Smári Lamude, þjálfari Vestra, í samtali við mbl.is eftir 1:0-sigur liðsins gegn Aftureldingu í úrslitum umspils um sæti í Bestu deild karla í knattspyrnu á Laugardalsvelli í kvöld.
„Ég er ótrúlega stoltur, glaður og nánast orðlaus. Mér fannst annað liðið töluvert hugrakkara og þora að halda í boltann. Það breyttist aðeins í framlengingunni og það kom meiri kraftur í leik Aftureldingar en mér fannst við sterkari aðilinn í venjulegum leiktíma.
Ég er gríðarlega stoltur af jafnvæginu í liðinu. Við vörðumst vel og sóttum vel líka en það mikilvægasta var að við gerðum þetta saman sem lið. Menn voru með sín hlutverk á hreinu fyrir leikinn og gerðu algjörlega það sem fyrir þá var lagt,“ sagði Davíð Smári.
Hvarf allt stress
Davíð Smári tók við þjálfun Vestra síðasta haust en fjöldi Vestfirðinga voru mættir á Laugardalsvöll í kvöld til þess að styðja liðið.
„Þessi stuðningur hérna í dag var ólýsanlegur. Mikið af fólkinu í stúkunni þurfti að ferðast einhverja 400 kílómetra til þess að styðja okkur sem er magnað. Ég var stressaður þegar ég var á leiðinni á völlinn en um leið og ég gekk inn á Laugrdalsvöll og sá fólkið okkar í stúkunni hvarf allt stress.
Við erum lítið bæjarfélag og lítið félag en þegar allir sameinast og róa í sömu átt þá eru áhyggjurnar engar. Ég er hrærður yfir þessu öllu saman,“ bætti Davíð Smári við í samtali við mbl.is.
