Aron samdi við Þór - stefnir erlendis í haust

Aron Einar Gunnarsson, landsliðsfyrirliði Íslands í knattspyrnu um árabil, skrifaði í dag undir tveggja ára samning við uppeldisfélag sitt, Þór á Akureyri.

Hann mun væntanlega leika með liðinu í ágústmánuði en sagði á fréttamannafundi Þórs að hann hefði áhuga á að leika erlendis í vetur, til að eiga möguleika á að spila á ný með landsliði Íslands, en þá þyrfti hann að fara eitthvert á lán fyrir 1. september.

Margir stuðningsmenn Þórs tóku á móti Aroni í Hamri, félagsheimili félagsins, sem var kynntur til leiks á fréttamannafundinum klukkan 17.

Aron er búinn að vera lengi fjarverandi vegna meiðsla. Hann spilaði ekkert með Al-Arabi í Katar tímabilið 2023-24 og síðasti leikur hans var landsleikur Slóvakíu og Íslands í Bratislava 16. nóvember 2023.