Var búin að uppljóstra því við aðra miðla

„Tilfinningin er mjög góð,“ sagði Arna Eiríksdóttir fyrirliði FH eftir sigur liðsins á FHL, 3:1, í 3. umferð Bestu deildarinnar á Kaplakrikavelli í dag.

FH fer vel af stað í Bestu deildinni en Arna skoraði tvö af þremur mörkum FH-liðsins.

„Þetta var mjög sterkur sigur hjá okkur og gott að fara úr leiknum með stigin þrjú,“ sagði Arna beint eftir leik. 

Frétt af mbl.is

Arna skoraði tvö þegar FH fór á toppinn

Gera mig gildandi inn í teig

Arna skoraði tvö mörk en það seinna var góður skalli eftir hornspyrnu. 

Hvernig var að skora tvö mörk?

„Það var frábært. Ég náði ekkert að skora í fyrra þannig ég var búin að setja mér markmiðið að gera mig aðeins meira gildandi inn í teig. Því var gott að ná inn tveimur í dag.“

Fyrra mark Örnu var skrautlegt en þá virtist hún ætla að senda boltann fyrir en hann hafnaði síðan í netinu. 

„Ég er eiginlega búin að uppljóstra við fótbolta.net að þetta átti að vera sending, þannig ég verð að segja það hér líka,“ játaði Arna. 

Hvað skilaði sigrinum í dag?

„Við komum flottar inn í byrjun leiksins. Við vorum ótrúlega góðar í pressunni og vorum að láta boltann rúlla vel. 

Síðan voru fyrstu 15 til 20 mínúturnar í seinni hálfleik ekki alveg nógu góðar en við náðum að vinna okkur úr því. Við tókum stjórn aftur á leiknum og þá gekk þetta vel.“

Íris Una Þórðardóttir meiddist illa í fyrri hálfleik en hún er annar leikmaður FH sem meiðist sem af er tímabils. Vigdís Edda Friðriksdóttir meiddist í fyrsta leik gegn Val. 

„Þetta leit alls ekki vel út og hræðilegt fyrir okkur að að tvær séu að meiðast snemma á tímabilinu. Hún fékk högg á hnéð en við verðum bara að vona það besta og vera bjartsýnar fyrir hennar hönd.“

FH er á toppnum með sjö af níu stigum mögulegum, hvað er að skila þeim árangri? 

„Við höfum komið ótrúlega vel undirbúnar í þetta mót. Þetta er í fyrsta sinn sem ég kem inn með FH eftir að hafa verið með þeim á undirbúningstímabilinu. 

Stelpurnar eru búnar að leggja mjög mikið á sig í allan vetur, ég held að það sé helsti lykillinn að þessu.“

FH heimsækir Þór/KA, sem hefur einnig farið vel af stað, í næstu umferð. 

„Sá leikur leggst mjög vel í mig. Ég býst við hörkuleik. Þær eru alltaf góðar í Boganum þannig við verðum að mæta á okkar besta degi.“ 

• Blogga um frétt