Íþróttir | Íslenski fótboltinn | mbl | 12.5.2025 | 7:00

6. umferð: Tvö met Eiðs Smára fallin – Björn orðinn þriðji

Alexander Rafn Pálmason fagnar markinu gegn ÍBV. Ljósmynd/Kristinn Steinn

Alexander Rafn Pálmason er orðinn yngsti markaskorari efstu deildar karla í fótbolta og þeir Björn Daníel Sverrisson og Nikolaj Hansen færðust ofar á listum yfir leikjahæstu menn sinna félaga þegar 6. umferð deildarinnar lauk í gærkvöld.

Alexander skoraði fyrsta mark KR í sigrinum á ÍBV, 4:1, á laugardaginn, aðeins 15 ára og 33 daga gamall. Fyrra metið átti Eiður Smári Guðjohnsen en hann skoraði 15 ára og 253 daga gamall fyrir Val í deildinni árið 1994.

Alexander Rafn á líka metið sem yngsti leikmaður deildarinnar en það setti hann á síðasta tímabili þegar hann lék 14 ára og 147 daga gamall með KR gegn ÍA. Samherji hans, Sigurður Breki Kárason, varð fyrr í vor yngsti byrjunarliðsmaður deildarinnar, 15 ára og 125 daga gamall, og hann tók þá líka met af Eiði Smára.

Frétt af mbl.is

Sigurður sló met Eiðs Smára

Björn Daníel Sverrisson lék sinn 241. leik fyrir FH í efstu deild gegn Víkingi í gærkvöld og er þar með orðinn þriðji leikjahæstur í sögu Hafnarfjarðarliðsins. Hann fór fram úr Davíð Þór Viðarssyni sem lék 240 leiki. Metið á Atli Guðnason, 285 leikir, og síðan kemur Atli Viðar Björnsson með 264 leiki.

Björn Daníel Sverrisson í Víkinni í gærkvöld. Ljósmynd/Kristinn Steinn

Nikolaj Hansen lék sinn 150. leik fyrir Víking í efstu deild gegn FH í gærkvöld. Hann er sjötti leikmaðurinn í sögu Víkings sem nær þeim leikjafjölda.

Nikolaj Hansen - 150 leikir í deildinni með Víkingi. mbl.is/Eyþór Árnason

Viktor Jónsson skoraði sitt 40. mark í efstu deild þegar Skagamenn steinlágu fyrir Val, 6:1, á laugardagskvöldið. Mörkin eru 35 fyrir ÍA og fimm fyrir Víking.

Viktor Jónsson í leiknum gegn Val. mbl.is/Birta Margret

Patrick Pedersen bætti við tveimur mörkum fyrir Val í stórsigrinum gegn ÍA og hefur nú skorað sex mörk í jafnmörgum leikjum á tímabilinu. Hann er kominn með 122 mörk í efstu deild og er níu mörkum frá markameti Tryggva Guðmundssonar.

Þessir eru markahæstir eftir sex umferðir:

6 Patrick Pedersen, Val
5 Eiður Gauti Sæbjörnsson, KR
4 Jóhannes Kristinn Bjarnason, KR
4 Tobias Thomsen, Breiðabliki
3 Höskuldur Gunnlaugsson, Breiðabliki
3 Jónatan Ingi Jónsson, Val
3 Kennie Chopart, Fram
3 Luke Rae, KR
3 Tryggvi Hrafn Haraldsson, Val
3 Viktor Jónsson, ÍA
3 Örvar Eggertsson, Stjörnunni