Framarar slógu bikarmeistarana út

Fram tryggði sér í kvöld sæti í átta liða úrslitum bikarkeppni karla í knattspyrnu með því að leggja ríkjandi bikarmeistara KA að velli, 4:2, í 16-liða úrslitum á Akureyri.

Fram kemur sér þar með í hóp Stjörnunnar, Vals, Keflavíkur, ÍBV, Aftureldingar og Þórs frá Akureyri sem eru öll komin í átta liða úrslit. Leikur Breiðabliks og Vestra er nú í gangi.

Leikurinn á Akureyri hófst með látum þar sem Fred Saraiva klúðraði vítaspyrnu eftir aðeins þriggja mínútna leik.

Fimm mínútum síðar kom Hallgrímur Mar Steingrímsson bikarmeisturum KA í forystu.

Á 21. mínútu jafnaði Róbert Hauksson metin fyrir Fram og hann sneri svo taflinu við á 34. mínútu.

Kennie Chopart umkringdur KA-mönnum í leiknum í kvöld. Ljósmynd/Þórir Tryggvason

Áður en fyrri hálfleikurinn var úti kom Kyle McLagan Frömurum í 3:1 og þannig stóðu leikar í leikhléi.

Varamaðurinn Birgir Baldvinsson minnkaði muninn fyrir KA snemma í síðari hálfleik en fimm mínútum síðar, á 58. mínútu, varð Hans Viktor Guðmundsson fyrir því óláni að skora sjálfsmark og kom þannig Fram aftur í tveggja marka forystu, 4:2.

Reyndust það lokatölur og þátttöku bikarmeistaranna því lokið.

• Blogga um frétt