KR og Vestri eru ansi nálægt því að komast í sögubækurnar, Vesturbæingarnir fyrir markaskor og Vestfirðingarnir fyrir fá mörk sem eru skoruð hjá þeim í fyrstu átta umferðunum í Bestu deild karla í fótbolta.

KR-ingar hafa skorað 24 mörk til þessa, þrjú að meðaltali í leik, og hafa samt aðeins unnið tvo af fyrstu átta leikjum sínum.

Aðeins eitt lið hefur skorað fleiri mörk í fyrstu átta umferðum deildarinnar á þessari öld. Það var Breiðablik árið 2022 en þá skoraði Kópavogsliðið 25 mörk í fyrstu átta leikjunum, vann þá alla og varð Íslandsmeistari um haustið.

Fimm sinnum á 20. öldinni skoraði lið fleiri en 24 mörk í fyrstu átta leikjunum og þar voru KR-ingar sjálfir fjórum sinnum að verki.

Þeir skoruðu 32 mörk í fyrstu átta leikjunum árið 1959, fyrsta árið sem leikin var tvöföld umferð í deildinni, og bættu um betur ári síðar þegar mörkin voru 33. Það er met sem hefur aldrei verið slegið. KR-ingar skoruðu sjálfir 28 mörk í fyrstu átta leikjunum 1961 og 25 mörk árið 1968.

Þar fyrir utan eru það bara Skagamenn sem hafa skorað fleiri mörk en KR í ár en ÍA skoraði 27 mörk í fyrstu átta leikjum deildarinnar árið 1993.

Vestramönnum gengur allt í haginn og þeir hafa aðeins fengið á sig fjögur mörk í fyrstu átta leikjunum. mbl.is/Karítas Sveina Guðjónsdóttir

Fjögur skoruð hjá Vestra

Vestri hefur aðeins fengið á sig fjögur mörk í fyrstu átta leikjunum og það er afar sjaldgæft í deildinni.

Aðeins tvisvar á þessari öld hafa lið sýnt betri varnarleik. Víkingar fengu á sig tvö mörk í fyrstu 17 leikjunum árið 2023 og FH-ingar þrjú mörk árið 2014.

Hjá Víkingum var um metjöfnun að ræða en Fram fékk á sig tvö mörk í fyrstu leikjunum árið 1988 og deilir því metinu með grönnum sínum. Svo merkilegt sem það er, þá er markatala beggja liða eftir átta leiki þessi ár sú sama, 17:2.

Stígur Diljan Þórðarson skoraði sitt fyrsta deildamark á ferlinum þegar hann kom Víkingum yfir í 2:1 sigrinum á ÍA á laugardagskvöldið.

Björn Daníel Sverrisson er orðinn sjötti markahæsti FH-ingurinn í efstu deild frá upphafi. Hann skoraði sitt 52. mark fyrir félagið gegn Breiðabliki í gærkvöld og fór uppfyrir Tryggva Guðmundsson sem skoraði 51 mark fyrir FH.

Jakob Byström skoraði tvö mörk í sínum fyrsta leik í deildinni frá upphafi þegar Fram vann KR 3:2 á föstudagskvöldið.

Markahæstir eftir átta umferðir:
7 Pat­rick Peder­sen, Val
6 Eiður Gauti Sæ­björns­son, KR
5 Aron Sigurðarson, KR
4 Daði Berg Jónsson, Vestra
4 Daní­el Haf­steins­son, Vík­ingi
4 Jó­hann­es Krist­inn Bjarna­son, KR
4 Tobi­as Thomsen, Breiðabliki
4 Tryggvi Hrafn Har­alds­son, Val
4 Vikt­or Jóns­son, ÍA
4 Örvar Eggerts­son, Stjörn­unni

Tengdar fréttir

Besta deild í tölum

14. umferð: Andri sló met í deildinni og Patrick þokast nær

• 13. umferð: Einstakt hjá Framara og tveir með félagsmet
• 12. umferð: Heimir sló met læriföðurins og stór áfangi Ingvars
• 10. umferð: Tímamót hjá Breiðabliki og Berglindi
• 9. umferð: Önnur þrenna í sögu FH - Lillý með stóran áfanga

» Fleiri tengdar fréttir

• Blogga um frétt