Íþróttir | Íslenski fótboltinn | mbl | 6.6.2025 | 20:42 | Uppfært 21:48

Glæsilegur sigur Íslands í Glasgow

Mynd 1 af 5 Guðlaugur Victor Pálsson fagnar eftir að hafa skorað þriðja mark Íslands sem gerði í raun út um leikinn. Ljósmynd/Alex Nicodim

Mynd 2 af 5 Hákon Arnar Haraldsson hitar upp á Hampden í kvöld. Ljósmynd/Alex Nicodim

Mynd 3 af 5 Hitað upp á Hampden Park. Ljósmynd/Alex Nicodim

Mynd 4 af 5 Hákon Rafn Valdimarsson, Jón Dagur Þorsteinsson og Daníel Leó Grétarsson spóka sig á Hampden Park fyrir leikinn í dag. Ljósmynd/Alex Nicodim

Mynd 5 af 5 Hampden Park er glæsilegur leikvangur og eins og sjá má á skjánum er VAR-myndbandatæknin notuð á leiknum í kvöld. Ljósmynd/Alex Nicodim

Arnar Gunnlaugsson fagnaði sínum fyrsta sigri sem þjálfari karlalandsliðs Íslands í knattspyrnu í kvöld þegar liðið sigraði Skota óvænt en verðskuldað í vináttulandsleik á Hampden Park í Glasgow, 3:1.

Andri Lucas Guðjohnsen og Guðlaugur Victor Pálsson skoruðu sitt markið hvor en annað mark íslenska liðsins var sjálfsmark. John Souttar skoraði fyrir Skota og jafnaði þá 1:1.

Þetta er jafnframt í fyrsta sinn sem Ísland sigrar Skotland í A-landsleik karla en Skotar höfðu unnið fyrstu sex viðureignir þjóðanna.

Skotar urðu fyrir áalli strax á 3. mínútu þegar markvörðurinn Angus Gunn lenti illa eftir að hafa gripið boltann og fór meiddur af velli. Cieran Slicker kom inn á í hans stað í sínum fyrsta landsleik.

Glæsilegt skot Andra Lucasar Guðjohnsens og boltinn söng í skoska markinu. Ljósmynd/Alex Nicodim

Hann var ekki lengi að fá á sig mark því á 8. mínútu komst Ísland yfir. Eftir spyrnu Slickers frá markinu skallaði Stefán Teitur Þórðarson til baka á Andra Lucas Guðjohnsen. Hann lét vaða á markið með vinstri fæti rétt utan vítateigs og sendi boltann óverjandi upp í vinstri samskeytin. Ísland var komið yfir, 1:0.

Fyrstu 15 mínúturnar voru mjög góðar hjá íslenska liðin sem pressaði Skotana vel og hleypti þeim lítið upp völlinn. Þeir komust svo smám saman betur inn í leikinn og fengu dauðafæri á 21. mínútu þegar George Hirst skallaði yfir íslenska markið af markteig eftir misheppnað spil út frá marki og sendingu Johns McGinns frá hægri.

Tveimur mínútum síðar átti Jón Dagur Þorsteinsson hörkuskot á mark Skota, Slicker varði, hélt ekki boltanum en gómaði hann rétt áður en Mikael Egill Ellertsson komst í hann.

Andri Lucas Guðjohnsen fagnar eftir að hafa komið Íslandi yfir á Hampden Park í kvöld. Ljósmynd/Alex Nicodim

Skotar jöfnuðu á 25. mínútu þegar John Souttar skoraði með skalla af markteig eftir hornspyrnu Max Johnston frá vinstri.

Bæði lið áttu ágætar tilraunir og Ísland náði forystunni á ný í lok fyrri hálfleiks. Albert Guðmundsson tók hornspyrnu frá vinstri og boltinn lak af þremur skoskum varnarmönnum í markteignum í netið. Staðan 2:1 fyrir Ísland í hálfleik.

Eftir rólega byrjun á síðari hálfleik náði Ísland að auka forskotið á 52. mínútu. Albert Guðmundsson tók aukaspyrnu frá hægri og sendi inn að vítapunkti þar sem Guðlaugur Victor Pálsson kom á ferðinni, kastaði sér fram og skallaði yfir markvörðinn og í netið, 3:1 fyrir Ísland.

Elías Rafn kom í veg fyrir að Skotar muninn fimm mínútum síðar þegar hann varði skalla Hirst á glæsilegan hátt.

Íslensku leikmennirnir fagna Jóni Degi Þorsteinssyni eftir að Ísland komst yfir í lok fyrri hálfleiks með sjálfsmarki Skotanna. Ljósmynd/Alex Nicodim

Skotar virtust hafa minnkað muninn á 62. mínútu þegar George Hirst skoraði en Scott McTominay var rangstæður í aðdraganda marksins.

Eftir nokkurn sóknarþunga í kjölfar þriðja marks Íslands dró af Skotunum þegar leið á hálfleikinn. Þeir voru mun meira með boltann en íslenska liðið varðist án teljandi vandræða og var með betri og betri tök á leiknum eftir því sem á leið.

Elías varði aftur vel á 87. mínútu þegar John McGinn reyndi að lyfta boltanum yfir hann frá vítateig en Elías var vel á verði og blakaði boltanum yfir þverslána.

Sigurinn var ekki í neinni hættu eftir það og liðið sigldi honum heim af talsverðu öryggi.