Íþróttir | Íslenski fótboltinn | Morgunblaðið | 14.10.2025 | 12:40

Stig sem gefur góða möguleika - þrír fengu tvö M

Guðlaugur Victor Pálsson skoraði og fékk tvö M. mbl.is/Eggert Jóhannesson

Arnar Gunnlaugsson getur borið höfuðið hátt ásamt lærisveinum sínum í íslenska karlalandsliðinu í fótbolta eftir októberleikina tvo í undankeppni heimsmeistaramótsins.

Arnar og hans menn fengu ekkert út úr Úkraínuleiknum á föstudag þrátt fyrir góða frammistöðu að mörgu leyti en bættu fyrir það með því að hirða óvænt stig af stjörnum prýddu liði Frakka á Laugardalsvellinum í gærkvöld, 2:2.

Tólfan tók víkingaklappið með íslensku landsliðsmönnunum í leikslok. Rúmlega níu þúsund áhorfendur stóðu og klöppuðu þeim lof í lófa á Laugardalsvellinum í gærkvöld. Það var eins og við værum komin átta til tíu ár aftur í tímann.

Það er magnað hvað Arnari hefur tekist að búa til öfluga og samstillta liðsheild á stuttum tíma í sumar og haust. Um leið er hann með lið sem vill vera með boltann og sækja í sínum leikjum, og hefur burði og getu til þess. Það skilaði fimm mörkum gegn Úkraínu og Frakklandi í þessum tveimur októberleikjum. Allt sem vantaði upp á í varnarleiknum gegn Úkraínumönnum, sem skoruðu fimm mörk úr sex skotum á föstudaginn, var til staðar í gærkvöld.

Óþrjótandi baráttuvilji þar sem miðverðirnir Daníel Leó Grétarsson og Sverrir Ingi Ingason fóru fyrir í erfiðum slag gegn líkamlega sterkum og fljótum Frökkum og unnu hvert návígið á fætur öðru. Erum við að þarna eignast miðvarðapar á pari við Kára og Ragga?

Guðlaugur Victor Pálsson er hinn óvænti markaskorari landsliðsins í seinni tíð og gerði sitt þriðja mark á árinu þegar hann kom Íslandi yfir undir lok fyrri hálfleiks. Frakkar virtust vera búnir að snúa leiknum sér í hag um miðjan síðari hálfleik eftir þunga pressu og mörk frá Christopher Nkunku og Jean-Philippe Mateta, öflugum sóknarmönnum úr ensku úrvalsdeildinni.

En þar sýndi íslenska liðið enn og aftur karakterinn sem í því býr. Rétt eins og það kom tvisvar til baka gegn Úkraínu á föstudag jafnaði það leikinn strax, Kristian Nökkvi Hlynsson eftir góðan undirbúning Alberts Guðmundssonar, og þessa jafnteflisstöðu, 2:2, varði íslenska liðið með kjafti og klóm til leiksloka.

Leiðin á HM er vissulega erfið fyrst aðeins náðist eitt stig í þessum októberglugga. Ísland er með fjögur stig og Úkraína sjö í baráttunni um umspilssætið dýrmæta. Það þýðir að Ísland þarf að vinna Aserbaídsjan í Bakú 13. nóvember til að komast í sem besta stöðu fyrir úrslitaleik gegn Úkraínu í lokaumferðinni þremur dögum síðar. En það er ekkert ómögulegt við það. Í raun bara ágætis möguleiki.

ÍSLAND – FRAKKLAND 2:2

Undankeppni HM karla 2026, Laugardalsvöllur 13. október 2025.

Lið Íslands: (4-4-2) Mark: Elías Rafn Ólafsson. Vörn: Guðlaugur Victor Pálsson, Sverrir Ingi Ingason, Daníel Leó Grétarsson, Logi Tómasson (Jón Dagur Þorsteinsson 62). Miðja: Mikael Egill Ellertsson, Hákon Arnar Haraldsson, Ísak Bergmann Jóhannesson (Stefán Teitur Þórðarson 85), Albert Guðmundsson (Mikael Anderson 85). Sókn: Sævar Atli Magnússon (Brynjólfur Willumsson 45), Daníel Tristan Guðjohnsen (Kristian Nökkvi Hlynsson 46).

Lið Frakklands: (4-3-3) Mark: Mike Maignan. Vörn: Jules Koundé, William Saliba, Dayot Upamecano, Lucas Digne. Miðja: Manu Koné, Eduardo Camavinga (Khéphren Thuram 75), Michael Olise. Sókn: Florian Thauvin (Maghnes Akliouche 64), Jean-Philippe Mateta (Hugo Ekitiké 89), Christopher Nkunku (Kingsley Coman 75).

Gul spjöld: Logi, Camavinga.

Dómari: Orel Grinfeeld, Ísrael.

Áhorfendur: 9.151.

ÍSLAND – FRAKKLAND 2:2

1:0 Guðlaugur Victor Pálsson 39.

1:1 Christopher Nkunku 63.

1:2 Jean-Philippe Mateta 68.

2:2 Kristian Nökkvi Hlynsson 70.

m m

Sverrir Ingi Ingason

Guðlaugur Victor Pálsson

Daníel Leó Grétarsson

Hákon Arnar Haraldsson

Ísak B. Jóhannesson

Elías Rafn Ólafsson

Mikael Egill Ellertsson

Albert Guðmundsson

Kristian Nökkvi Hlynsson

Jón Dagur Þorsteinsson lék sinn 50. A-landsleik fyrir Íslands hönd.

Guðlaugur Victor Pálsson hefur nú skorað þrjú af fimm mörkum sínum fyrir landsliðið á þessu ári og er markahæsti leikmaður liðsins árið 2025 ásamt Alberti Guðmundssyni.

Guðlaugur Victor skoraði fimmta markið í sínum 54. landsleik og Kristian Nökkvi Hlynsson skoraði sitt annað mark í sínum 8. landsleik. Bæði mörk Kristians hafa komið í þessari undankeppni HM.

Ísland hefur skorað 11 mörk í leikjunum fjórum í undankeppninni og það hefur liðið aldrei áður gert í fyrstu fjórum leikjum í undankeppni stórmóts.

Enginn verður í banni í næsta leik en Mikael Egill Ellertsson, Mikael Anderson og Logi Tómasson eru með eitt gult spjald hver.