Óveður olli sambandsleysi í leik Tyrkja og Þjóðverja
Margur knattspyrnuáhugamaðurinn hefur eflaust orðið fyrir vonbrigðum í gærkvöld þegar óveður í Austurríki olli því að nærri 20 mínútur af leik Tyrkja og Þjóðverja í undanúrslitum EM í knattspyrnu náðu ekki augum sjónvarpsáhorfenda um nær allan heim.
Óveðrið olli nokkurra millisekúndna rafmagnsleysi í útsendingarmiðstöð mótsins, sem staðsett er í Vínarborg, sem varð til þess að útsendingarkerfið lá niðri í rúmlega fimm mínútur á meðan endurræsing stóð yfir. Þetta gerðist tvisvar sinnum og í kjölfarið tók Knattspyrnusamband Evrópu, UEFA, þá ákvörðun að skipta yfir í varaaflstöð en til þess þurfti að endurræsa útsendingarkerfið enn einu sinni.
Áhorfendur misstu því af einum fjörugasta lokakafla í leikjum mótsins, því tvö mörk voru skoruð á meðan útsendingin lá niðri, en hún komst aftur í gang í þann mund sem Philipp Lahm skoraði sigurmark Þjóðverja í 3:2 sigri.
„Kerfið var gallað sem olli því að þrátt fyrir rafmagnstruflanirnar var
ekki skipt yfir í varaaflsstöðina. Við höfum hins vegar lagfært kerfið
og þeir leikir sem eftir eru munu ekki verða truflaðir,“ sagði William
Gaillard, fjölmiðlafulltrúi hjá UEFA.
Leikurinn sjálfur fór fram í Basel í Sviss og gat svissneska sjónvarpið sýnt leikinn í heild sinni í gegnum annað útsendingarkerfi. Þýskir áhorfendur misstu jafnframt ekki af neinu því þarlend sjónvarpsstöð notaði merki frá svissneska sjónvarpinu til að koma öllum leiknum til skila.
