Knattspyrnusamband Evrópu, UEFA, hefur útnefnt portúgalska miðjumanninn Renato Sanches besta unga leikmanninn í Evrópukeppninni í Frakklandi.
Sanches, sem verður 19 ára í ágúst, er yngsti leikmaður sem hefur verið í byrjunarliði í úrslitaleik Evrópukeppninnar. Hann lék sinn 11. landsleik í gærkvöld og fyrsta mark sitt fyrir Portúgal gerði hann í jafnteflisleiknum gegn Póllandi í átta liða úrslitum keppninnar. Þá skoraði hann jafnframt í vítaspyrnukeppninni og var valinn maður leiksins annan leikinn í röð en Sanches fékk einnig þá útnefningu þegar Portúgal vann Króatíu í sextán liða úrslitunum.
Næstir á eftir honum í kjörinu voru þeir Kingsley Coman frá Frakklandi og Raphael Guerreiro frá Portúgal.
Sanches hefur verið í röðum Benfica frá 8 ára aldri en hann var í maí seldur til Bayern München fyrir 35 milljónir evra og samdi þar til fimm ára.