Íslenska kvennalandsliðið í knattspyrnu er mætt til Englands en liðið lenti á flugvellinum í Manchester síðdegis í dag.

Liðið hefur undanfarna daga æft í Herzogenaurach í Þýskalandi við frábærar aðstæður en Ísland mætir Belgíu í fyrsta leik sínum í D-riðli Evrópumótsins á akademíuvelli Manchester City í Manchester á sunnudaginn kemur.

Ásamt Íslandi og Belgíu leika Ítalía og Frakkland einnig í riðlinum en Ísland mætir Ítalíu hinn 14. júlí í Manchester og loks Frakklandi hinn 18. júlí í Rotherham.

Íslenska liðið mun dvelja í Crewe á meðan riðlakeppnin stendur en Evrópumótið hefst formlega í kvöld þegar heimakonur í Englandi taka á móti Austurríki í upphafsleik mótsins í A-riðli keppninnar á Old Trafford í Manchester.

Smelltu hér til að horfa á Dætur Íslands, vefþætti mbl.is um leikmenn íslenska kvennalandsliðsins.