Nú er endanlega ljóst að íslenska karlalandsliðið í handknattleik hafnaði í 13. sæti af 16 liðum í lokakeppni Evrópumótsins sem haldið er í Króatíu.
Sem kunnugt er komst Ísland ekki í milliriðla og hafnaði í fjórða og neðsta sæti A-riðils og er úr leik ásamt Austurríki, Svartfjallalandi og Ungverjalandi. Þrjú lið af fjórum í riðlunum fjórum komust áfram í milliriðla en tap Íslands fyrir Serbíu í gær gerði út um vonir Íslands.
Ísland vann þó einn leik á mótinu, gegn Svíþjóð í fyrstu umferðinni, og fékk því tvö stig í riðlinum. Hinar þjóðirnar sem eru úr leik töpuðu öllum sínum leikjum og því er það markatala sem ræður niðurröðun þeirra.
Tólf þjóðir halda áfram keppni en lokaröðunin á þjóðunum sem sitja eftir er því eftirfarandi:
13. Ísland
14. Ungverjaland
15. Austurríki
16. Svartfjallaland
Eins og kom fram á mbl.is fyrr í kvöld er Ísland öruggt með sæti í efri styrkleikaflokki fyrir umspil vegna heimsmeistaramótsins sem fram fer á næsta ári.