Spænska landsliðið mun að öllum líkindum tefla fram óvæntu leynivopni gegn Frökkum þegar þjóðirnar eigast við í undanúrslitum Evrópumótsins í handknattleik sem fram fer í Króatíu.
Gamli refurinn Arpad Sterbik, einn besti markvörður síðari ára, er á leið til móts við liðið í Zagreb. Óvíst er með frekari þátttöku Gonzalo Pérez, markvörð Barcelona, sem meiddist illa á hné að því talið er þegar Spánn vann Þýskaland í gær. Hann mun gangast undir myndatöku í dag og þá munu eðli meiðslanna koma í ljós.
Hvað sem því líður þá mun Sterbik vera til taks í Króatíu. Hann er nú 38 ára gamall og hefur leikið með Evrópumeisturum Vardar í Makedóníu frá árinu 2014. Áður var hann á Spáni í 10 ár, fyrst með Ciudad Real, sem nú heyrir sögunni til, og síðan Barcelona.
Sterbik, sem er fæddur í gömlu Júgóslavíu, öðlaðist spænskan ríkisborgararétt og var um leið kallaður inn í spænska landsliðið og lék sinn fyrsta leik með því árið 2008. Hann var valinn besti markvörður heims af Handball-planet í fyrra.