„Við stjórnuðum leiknum í 58 mínútur og spiluðum frábærlega í framlengingunni. Ég felldi tár eftir leikinn,“ sagði Jim Gottfridsson leikmaðurinn öflugi í liði Svía eftir sigurinn gegn Dönum í undanúrslitunum á Evrópumótinu í handknattleik í kvöld.
Svíar fögnuðu sigri eftir dramatískan framlengdan leik í Zagreb og mæta Spánverjum í úrslitaleiknum á sunnudaginn.
„Við verðum litla liðið í þeim leik. Spánn hefur öllu að tapa en við allt að vinna,“ sagði Gottfridsson sem skoraði 7 mörk fyrir Svía í kvöld.
Svíar hafa unnið Evrópumeistaratitilinn oftast allra liða eða fjórum sinnum en síðast fögnuðu þeir sigri á heimavelli 2002 eftir að hafa lagt Íslendinga að velli í undanúrslitunum í Globen höllinni í Stokkhólmi.