Á ekki að vera vinargreiði

Nikolaj Jacobsen landsliðsþjálfari Dana segir að vinagreiði eigi ekki að ...
Nikolaj Jacobsen landsliðsþjálfari Dana segir að vinagreiði eigi ekki að ráða þegar dómurum er raðað niður á kappleiki á stórmótum. -

Nikolaj Jacobsen, landsliðsþjálfari Dana í handknattleik karla, er langt frá því að vera sáttur við handknattleikssamband Evrópu, EHF, og dómarana sem dæmdu viðureign Dana og Frakka um þriðja sæti á Evrópumeistaramótinu í handknattleik í Króatíu í gær.

Jacobsen var æfur í leikslok og sagði það hafa verið líkst vinargreiða af hálfu EHF að láta Rúmenana Constantin Din og Sorin-Laurentiu Dinus dæma leikinn en þeir eru nú að kveðja sviðið sem alþjóðlegir dómarar. Viðureign Dana og Frakka var sú síðasta sem þeir dæma vegna aldurs á stórmóti.

„Mér þykir það setja handboltann og þennan leik niður að þegar mönnum er gerður vinargreiði með kveðjuleik vegna þess að þeir eru að hætta að dæma. Það er óviðunandi. Þetta á ekki að vera vinargreiði,“ sagði Jacobsen og var heitt í hamsi.

Talsmaður EHF segir þá ákvörðun að láta Din og Dunus dæma umræddan leik hafi eingöngu verið tekin með hliðsjón af frammistöðu þeirra í fyrri leikjum keppninnar. Ekki hafi neitt annað búið að baki ákvörðunar dómaranefndar mótsins. Það eigi við niðurröðun á dómara á öllum leikjum mótsins.

Danir voru óánægðir með dómgæsluna í leiknum, ekki síst þegar dæmt var tvígrip á Rasmus Lauge í hraðaupphlaupi í stöðunni 28:26 fyrir Frakka. Lauge gat þá minnkað muninn í eitt mark, skömmu fyrir leikslok. Greinilegt er að um rangan dóm var að ræða sem virtist m.a. koma leikmönnun franska liðsins í opna skjöldu.

Din og Dinus hafa oft þótt umdeildir. M.a. sendi Handknattleikssamband Íslands inn athugasemd vegna dómgæslu þeirra á síðustu mínútu viðureignar Austurríkis og Íslands á EM 2010 eftir að þeir stöðvuðu leiktímann þvert á reglur. Athugasemd eða kæru vegna framkvæmdar leiksins var vísað frá.

mbl.is