„Nú þurfum við að treysta á aðra“

„Þessi úrslit eru ógeðslega svekkjandi,“ sagði hornamaðurinn Sigvaldi Björn Guðjónsson þegar mbl.is ræddi við hann eftir leikinn gegn Króatíu á EM í handknattleik í Búdapest.

Sigvaldi skoraði fimm mörk í leiknum en það dugði ekki því Króatía vann naumlega 23:22.

„Mér fannst að við hefðum átt að vinna þennan leik. Þess vegna er þetta enn meira svekkjandi. Við áttum möguleika á að koma okkur í góða stöðu með því að vinna tvo síðustu leikina í milliriðlinum. En nú þurfum við að treysta á aðra til að eiga möguleika að komast í undanúrslitin.“

Sigvaldi Björn hefur verið atkvæðamikill á EM. Ljósmynd/Szilvia Micheller

Sigvaldi hefur leikið alla sex leikina til þessa í mótinu og hefur fengið mjög litla hvíld en Teitur leysti hann stuttlega af á móti Dönum. Finnur Sigvaldi ekki fyrir þreytu?

„Auðvitað er maður þreyttur en maður vill spila og maður þarf  að hugsa vel um sig,“ sagði Sigvaldi Björn við mbl.is. 

• Blogga um frétt