Íþróttir
|
Enski boltinn
| mbl
| 22.3.2007
| 8:47
Eiður Smári orðaður við Manchester United
Eiður Smári Guðjohnsen í baráttunni með Barcelona.
Reuters
Breska götublaðið The Sun greinir frá því í dag að Eiður Smári Guðjohnsen sé ofarlega á óskalista Sir Alex Ferguson knattspyrnustjóra Manchester United sem vilji fá hann frá Barcelona í sumar.
Ferguson er sagður vilja fá Eið Smára til að fylla skarð Svíans Henrik Larssons en Eiður var einmitt fenginn til Barcelona til að taka við hlutverki Larssons hjá Börsungum.
Í The Sun kemur fram að Manchester United geti fengið Eið Smára á 8 milljónir punda en Eiður gekk sem kunnugt er til liðs við Spánarmeistarana síðastliðið sumar frá Chelsea og gerði fjögurra ára samning við Katalóníuliðið.
