Flókið að fara á Anfield

Pep Guardiola.
Pep Guardiola. AFP

Pep Guardiola, knattspyrnustjóri Manchester City, er spenntur fyrir því að mæta með sína ljósbláu hersveit á Anfield á morgun þar sem liðið mætir Liverpool í ensku úrvalsdeildinni. Það verður þó ekki einfalt að mati Guardiola.

„Það er flókið að fara á Anfield – en við náum vonandi að sýna hverjir við erum. Það er það eina sem ég mun berjast fyrir að mínir leikmenn geri í leiknum á morgun,“ sagði Guardiola en hans menn hafa 15 stiga forskot á toppi ensku úrvalsdeildarinnar.

Spurður um Jürgen Klopp, knattspyrnustjóra Liverpool, sparaði Spánverjinn ekki hrósið og dáist að nálgun Þjóðverjans á leikinn.

„Við náum vel saman. Ég hitti hann í Þýskalandi og ber mikla virðingu fyrir honum. Ég kunni að meta hans nálgun á leikinn jafnvel áður en hann var hjá Dortmund,“ sagði Guardiola.

„Það er alltaf erfitt að mæta Liverpool á útivelli. Það er alltaf mikil áskorun að sjá hvort við höfum bætt okkur og getum spilað eins og við viljum á stóru leikvöngunum,“ sagði Guardiola enn fremur.

mbl.is