Bruce notaði Birki sem sýnidæmi

Stuðningsmenn Aston Villa sem og knattspyrnustjórinn Steve Bruce virðast ánægðir með frammistöðu Birkis Bjarnasonar í síðustu tveimur leikjum liðsins.

Birkir hefur sáralítið fengið að spila á leiktíðinni og sagði við mbl.is fyrir skömmu að ef ekkert breyttist væru meiri líkur en minni á að hann færi frá Villa nú í janúar. En hlutirnir hafa aðeins breyst, því Birkir þótti standa sig afar vel á miðjunni hjá Villa þær 45 mínútur sem hann spilaði í sigri á Nottingham Forest fyrir viku og hann átti einnig góðan leik á miðjunni í gær þegar hann spilaði 90 mínútur í 3:1-sigri á Barnsley. Það er aðeins þriðji deildarleikur Birkis á tímabilinu í byrjunarliði Villa.

Bruce fór yfir víðan völl á fréttamannafundi eftir sigurinn í gær og talaði meðal annars um það hve stórum og góðum leikmannahópi hann hefði úr að velja.

„Ég er með 4-5 leikmenn sem þurftu bara að æfa með U23-liðinu í morgun. Góða leikmenn, en svona er hópurinn. Eins og Birkir til dæmis, hann kemur inn í liðið og hefur verið frábær. Mér fannst hann verða að spila í dag. Ég varð að verðlauna hópinn. Glenn Whelan var klár í slaginn og hinn stóri Mile Jedinak var næstum því 100%, en ég ákvað að Birkir þyrfti að spila. Ef hann hefði ekki spilað þá hefði hópurinn ekki haft þá trú að hægt væri að koma inn, standa sig vel og halda sér í liðinu,“ sagði Bruce.

Frétt af mbl.is

Ef hlutirnir breytast ekki verð ég að fara

Vefmiðillinn HITC safnaði saman athugasemdum frá stuðningsmönnum Villa eftir leikinn og þeir virðast, eins og sjá má hér að neðan, ánægðir. Næsti leikur Villa er á útivelli gegn Sheffield Wednesday þriðjudaginn 30. janúar en liðið er í 4. sæti ensku B-deildarinnar með 50 stig, þremur stigum á eftir Derby sem er í 2. sæti en tvö efstu liðin fara beint upp í úrvalsdeildina í vor. Liðin í 3.-6. sæti leika um eitt laust sæti.

• Blogga um frétt