Eitt markið gæti dugað

Vincenzo Montella þjálfari spænska liðsins Sevilla segir að eitt mark geti dugað til að slá Manchester United út en liðin mætast á Old Trafford í kvöld í síðari viðureigninni í 16-liða úrslitum Meistaradeildar Evrópu í knattspyrnu.

Liðin skildu jöfn, 0:0, í fyrri leiknum í Sevilla fyrir hálfum mánuði þar sem David de Gea markvörður United kom í veg fyrir ósigur Manchester-liðsins.

„Þetta er sérstakur leikur því við getum komist í átta liðin úrslitin. Þetta er sérstakur leikur fyrir mig og félagið því 60 ár eru liðin frá því Sevilla komst síðast í átta liða úrslit. Ég geri mér grein fyrir því að þetta verður erfiður leikur en það er gott sjálfstraust í mínu liði. Manchester United er frábært lið sem á sér mikla sögu. Við þurfum að gera okkar allra besta og það gæti dugað fyrir okkur að skora bara eitt mark,“ sagði Montella á fréttamannafundi í dag.

Manchester United hefur aðeins tapað einu sinni gegn spænsku liði á heimavelli í Meistaradeildinni í 9 leikjum. Það var gegn Real Madrid tímabilið 2012-13.

• Blogga um frétt