Enska knattspyrnudómaranum Michael Oliver hefur verið boðinn stuðningur frá lögreglu eftir hótanir sem honum hafa borist á samfélagsmiðlum eftir vítaspyrnudóminn í viðureign Real Madrid og Juventus í Meistaradeild Evrópu í knattspyrnu í síðustu viku.
Oliver og Lucy eiginkona hans hafa verið í skotlínunni frá því leiknum lauk en Oliver dæmdi vítaspyrnu á Juventus í uppbótartíma sem Cristiano Ronaldo skoraði úr og skaut þar með Real Madrid áfram í undanúrslitin. Þá rak hann markvörðinn Gianluigi Buffon af velli en Buffon varð æfur út í Oliver þegar hann benti á vítapunktinn og hraunaði svo yfir enska dómarann í viðtölum eftir leikinn.
Símanúmer eiginkonu Olivers var birt á samfélagsmiðlum og henni hafa borist ljót smáskilaboð síðustu dagana.
„Við erum meðvitaðir um ógnandi skilaboð sem hafa verið birt á samfélagsmiðlum. Þessi tegund af hegðun er algjörlega óviðunandi og þeir sem skrifa skilaboðin þurfa að vera meðvitaðir um að þeir gætu verið dæmdir fyrir refsiverð brot,“ er haft eftir lögregluyfirvöldum á Englandi.