Forsvarsmenn ensku úrvalsdeildarinnar í knattspyrnu hafa í meginatriðum náð samkomulagi um vetrarfrí í deildinni frá og með árinu 2020.
Það hefur lengi verið rætt að innleiða vetrarfrí í enska knattspyrnu til að minnka álagið á leikmönnum deildarinnar en slík hlé tíðkast í flestum stórum deildum Evrópu.
Á Englandi hefur það þó verið þannig að aldrei er jafn mikið álag eins og akkúrat í kringum hátíðarnar og áramótin. Ekki stendur til að breyta því og verður áfram leikið þétt í kringum jól og áramót en aftur á móti stendur til að öllum liðum verði tryggt tveggja vikna hlé í lok janúar og byrjun febrúar.
Ekki verður þó gert algjört hlé á ensku úrvalsdeildinni heldur verður leikjaálagi liðanna hagrætt með þeim hætti að á tveimur leikhelgum verða spilaðir fimm leikir í stað tíu. Öll liðin væru því ekki í fríi á sama tíma og engin helgi verður alveg knattspyrnulaus.
Til að veita þessu nýja fyrirkomulagi brautargengi, verða 16-liða úrslit enska bikarsins leikin í miðri viku og þeir leikir leiknir til þrauta, þ.e. ekki verður gripið til annars leik í kjölfar jafnteflis.
Margir telja þétt leikjaálag á Englandi hafa slæm áhrif á leikmenn úrvalsdeildarinnar þar sem álagið þykir of mikið. Efstu deildir landa á borð við Spán og Þýskaland styðjast við þetta fyrirkomulag og vona sumir að vetrarfrí verði til þess að endurnærðir leikmenn enska landsliðsins fagni betri árangri á alþjóðavettvangi.