Chelsea er komið í úrslitaleik enska bikarsins annað árið í röð eftir 2:0 sigur á Southampton í undanúrslitum sem fram fóru á Wembley í Lundúnum í dag. Framherjar þeirra bláu sáu um markaskorunina í dag hvor í sínu lagi. Chelsea mætir Manchester United í úrslitaleik 19. maí næstkomandi.
Frakkinn Olivier Giroud kom Chelsea yfir er hann prjónaði sig í gegnum vörn Southampton eftir frábæran undirbúning frá Eden Hazard strax á 46. mínútu rétt eftir að dómarinn hafði flautað síðari hálfleikinn af stað.
Giroud fór svo af velli á 80. mínútu og inn kom Alvaro Morata sem tvöfaldaði forystu Chelsea aðeins tæpum tveimur mínútum eftir að hafa komið inn á, 2:0 og urðu það lokatölur.
Southampton-liðið var ekki langt frá því að jafna metin þegar staðan er 1:0 er varamaðurinn Nathan Redmond skaut á markið fyrir utan teig er 18 mínútur voru eftir en Willy Caballero í markinu hjá Chelsea varði mjög vel. Mikil hætta var við mark Chelsea í hornspyrnunni sem fylgdi en bláliðar sluppu með skrekkinn.
Chelsea er þar með komið í úrslitaleik enska bikarins annað árið í röð en í fyrra tapaði liðið gegn Arsenal, 2:1.