Klopp færði ungstirninu tíðindin um HM

Jürgen Klopp og Trent Alexander-Arnold á góðri stundu.
Jürgen Klopp og Trent Alexander-Arnold á góðri stundu. AFP

Hinn 19 ára gamli Trent Alexander-Arnold, bakvörður Liverpool, var í dag valinn í lokahóp Englands fyrir heimsmeistaramótið í knattspyrnu í Rússlandi í sumar. Kappinn á engan landsleik að baki en hefur komið sterkur inn í lið Liverpool á tímabilinu.

Alexander-Arnold ferðaðist í dag til Spánar með Liverpool þar sem liðið býr sig undir úrslitaleik Meistaradeildarinnar við Real Madrid síðar í mánuðinum. Hann greindi frá því að það hafi verið Jürgen Klopp, stjóri Liverpool, sem sagði honum gleðitíðindin.

„Þetta var ótrúleg stund að heyra að ég væri að fara á HM. Við vorum að fara upp í vélina til Spánar þegar stjórinn kom og talaði við mig. Hann spurði mig hvort ég væri búinn að plana eitthvað sumarfrí á meðan HM stendur yfir, en ég neitaði því. Þá sagði hann: „Það er gott, þú ert nefnilega í hópnum!“ Þetta var ótrúlegt að heyra,“ sagði Alexander-Arnold.

mbl.is