Hjartað segir Liverpool en hausinn Real Madrid

Mohamed Salah og Cristiano Ronaldo verða eflaust í stórum hlutverkum ...
Mohamed Salah og Cristiano Ronaldo verða eflaust í stórum hlutverkum í úrslitaleiknum annað kvöld. AFP

Fyrrverandi leikmaður Liverpool og fyrrum þjálfari Real Madrid vonast til þess að Liverpool vinni sigur í Meistaradeildinni á morgun en þá mætast Liverpool og Real Madrid í úrslitaleiknum sem fram fer í Kiev í Úkraínu.

John Toshack er þessi maður en hann á tengingar við bæði liðin sem verða í eldlínunni á ólympíuleikvanginum í Kænugarði annað kvöld.

Spurður hvort hann hafi trú á að Liverpool geti unnið Real Madrid og fagnað sínum sjötta Evrópumeistaratitli gegn ríkjandi Evrópumeisturum Real Madrid sagði Walesverjinn;

„Hjarta mitt segir Liverpool en hausinn Real Madrid,“ sagði Toshack, sem lék með Liverpool frá 1970 til 1978 og varð þrívegis Englandsmeistari með liðinu. Hann þjálfaði lið Real Madrid á tveimur skeiðum. Fyrst 1989-90 og aftur árið 1999. Real Madrid vann Spánarmeistaratitilinn undir hans stjórn árið 1990.

„Frá sjónarhóli þess hlautlausa þá er ég gríðarlega spenntur fyrir leiknum. Með þá leikmenn sem verða inni á vellinum þá er gott tækifæri að leikurinn verði frábær. Ég vona að þetta verði 90 mínútur af frábærri skemmtun og að Liverpool lyfti bikarnum í leikslok,“ segir Toshack.

mbl.is