Knattspyrnustjórinn Roy Hodgson hefur framlengt samning sinn við enska knattspyrnufélagið Crystal Palace en þetta staðfesti félagið á heimasíðu sinni í morgun. Fyrrverandi samningur hans við félagið átti að renna út næsta sumar en hann hefur nú framlengt til ársins 2020.
Hodgson er orðinn 71 árs gamall en hann tók við Palace í september á síðasta ári þegar liðið var stigalaust á botni ensku úrvalsdeildarinnar. Liðið endaði í ellefta sæti deildarinnar undir hans stjórn.
Hann stýrði enska landsliðinu áður en hann tók við Palace á síðasta ári en hann hætti með enska landsliðið eftir EM í Frakklandi 2016, þegar England féll úr leik í sextán liða úrslitum keppninnar eftir 2:1-tap fyrir Íslandi í Nice.