José Mourinho, knattspyrnustjóri Manchester United, segir að Paul Pogba, miðjumaður liðsins, sé ánægður hjá félaginu. Pogba var sterklega orðaður við brottför frá félaginu á dögunum en Sky Italia greindi frá því í vikunni að United hefði hafnað tilboði frá spænska stórliðinu Barcelona í Pogba. Þá var leikmaðurinn sjálfur sagður vilja komast burt frá félaginu en Mourinho ítrekar að það séu engin vandamál á milli hans og Pogba.
„Pogba mætti til æfinga á mánudaginn. Hann var glaðbeittur, stoltur og tilbúinn að vinna vinnuna sína. Hann hefur staðið sig mjög vel á æfingum, alla vikuna, og ég mun ræða betur við hann í dag enda stutt síðan hann kom aftur og það er erfitt að gera sér grein fyrir því hversu þreyttur líkami hans er. Ég á ekki von á því að hann spili mikið gegn Leicester en vonandi spilar hann eitthvað. Hann er ánægður hjá United og það skiptir mestu máli.“
Pogba missti sæti sitt í byrjunarliði United á síðustu leiktíð en hann og Mourinho virtust ekki alltaf vera sammála um hlutina. Pogba varð heimsmeistari með Frökkum í sumar og spilaði leikmaðurinn frábærlega í Rússlandi. Mourinho vonast til þess að miðjumaðurinn haldi uppteknum hætti með United á leiktíðinni sem hefst í kvöld þegar United fær Leicester City í heimsókn á Old Trafford.